Прескокни до содржина

Прекрасни 4K видеоснимки од вселената снимени со α7S II 

Од јапонскиот експериментален модул „KIBO“, на Меѓународната вселенска станица 

α7S II успешно го сними првото 4K видео во вселената од комерцијална класа.

Новиот систем за снимање, вклучувајќи го α7S II, беше поставен во изложениот дел (EF) на јапонскиот експериментален модул KIBO на Меѓународната вселенска станица (ISS). 

Возилото за транспорт H-II KOUNOTORI - јапонско вселенско летало за транспорт на товар што ја опслужува Меѓународната вселенска станица - беше лансирано од најголемиот јапонски комплекс за лансирање ракети Tanegashima Space Center на 9 декември 2016 година и беше опремено со револуционерниот фотоапарат α7S II од Sony. Тоа, на Земјата, ни овозможи да гледаме видеоснимки во 4K или Full HD резолуција, како и фотографии со 12 милиони точки снимени од вселената.
Меѓународната вселенска станица орбитира на висина од прибл. 400 километри (249 милји) над Земјата и се движи со брзина од прибл. 8 км/сек. (5 милји/сек.), а може да ја заобиколи Земјата за прибл. 90 минути (16 обиколки/ден) - побрзо од куршум.
Зошто α7S II беше избран да се користи во неверојатното опкружување во вселената и каков вид на објекти се надеваа дека ќе снимат со α7S II? Зборувавме со Toshitami Ikeda, постар инженер од JAXA кој бил задолжен за системот за надворешна употреба.

(интервјуиран на 13 декември 2016 година)

За слики што можат да се видат само од вселената

Невообичаени природни појави и променливиот изглед на Земјата.

- За почеток, може ли да ни раскажете за мисијата, улогата и целта на фотоапаратот за надворешна употреба?

Мисијата на фотоапаратот за надворешна употреба е да снима јасни слики од Земјата од Меѓународната вселенска станица. Кога ќе снимите неверојатни и прекрасни слики од вселената од некоја огромна катастрофа на Земјата, ќе ги сфатите перспективите што не можат да се видат на Земјата, како што се штетите и зафатената површина. Исто така, можеме да следиме еколошки промени преку континуирано снимање слики од определено место, исто како набљудување од фиксна точка. Може да забележиме промена на бојата на морето со снимање слики од подводен вулкан или движење на санта мраз. Со препознавање на ваквите промени на Земјата, може да придонесеме за сфаќање на глобалните еколошки проблеми, а веруваме и дека со испраќање на сликите што не може да се снимат на Земјата ќе се зголеми интересот за вселенски развој. 

- α7S II може да снима и да фотографира. Како ќе ги поделите овие апликации?

Мислам дека динамичките сцени од возилата за пренос на товар како KOUNOTORI што пристигнуваат или си заминуваат од Меѓународната вселенска станица, или, пак од јапонскиот архипелаг од Меѓународната вселенска станица што патуваат од југ кон север, може да се пренесат многу реалистично со подвижни слики. Од друга страна, пак, фотографиите нудат подобра репродукција на тоновите на боите што може да се искористи за анализа на подискретни промени како промените на боите на океаните и шумите.

Очекувања за големата чувствителност на α7S II и првата 4K видеоснимка надвор од Меѓународната вселенска станица

Можност за светли слики од Земјата навечер и од вселената

- Ве молам кажете ни зошто одлучивте α7S II да се користи како фотоапарат за надворешна употреба.

Системот за снимање надвор од станицата испраќа слики и се контролира од Земјата преку далечински управувач. α7S II има вграден USB интерфејс и поддржува оперативни команди поради што е одличен избор за користење како фотоапарат за надворешна употреба и за лесно техничко ракување. Освен тоа, феномените како поларната светлина, метеорите или ноќниот приказ на Земјата од вселената изгледаат поинаку кога се гледаат на површината на Земјата, а големата чувствителност за снимање на α7S II е совршена за ноќно снимање. Меѓународната вселенска станица ја обиколува Земјата на секои 90 минути, а со претходниот систем не се ни осмелувавме да снимаме навечер, што како интервал се појавува на секои 45 минути. Импресиониран сум од неговите перформанси и можноста за снимање дури и во ноќта.

- Мислам дека и очекувањата за снимање 4K видео во вселената се високи.

Секако, можноста за снимање 4K видеоснимки е важен чекор. Ова ќе биде прв случај на снимање во 4K со фотоапарат од комерцијална класа поставен на надворешната страна на Меѓународната вселенска станица и едвај чекам да снимиме најживописни снимки досега. Првично планиравме да го искористиме α7S. Но, во 2016 година одлучивме да го замениме со модел од втората генерација, односно α7S II, кој нуди вградена поддршка за снимање 4K видеоснимки. Времето за инсталација беше многу кратко, а повторувањето на тестот беше многу тешко. Компатибилноста на командите кај α7S и α7S II и употребата на исти сензори беа олеснителни фактори што ни овозможија да напредуваме побрзо. Меѓутоа, постоеше мала разлика помеѓу некои делови и софтверот - на пример, процесот на вклучување на напојувањето е малку поинаков и моравме да се потрудиме за да најдеме решение за тоа.
Штом инженерите од Sony нè информираа за делумните промени во фирмверот и за разликите помеѓу α7S и α7S II, ги извршивме потребните процени и прилагодувања и ги имплементиравме во KIBO.
Возбудени сме за можностите за снимање во 4K што ги нуди овој фотоапарат за надворешна употреба.

- Освен снимање во 4K, дали има други разлики со претходниот фотоапарат за надворешна употреба?

Досега фотоапаратот за надворешна употреба беше прикачен на изложениот дел на KIBO и секогаш беше насочен кон Земјата, но сега имаме носач што ни овозможува движење по 2 оски, а тоа значи дека и кога е свртен кон Земјата ќе можеме да ја снимаме вселената. Снимањето на Земјата и вселената од различни агли ќе ни овозможи да добиеме слики што досега не било возможно да се снимат.

α7S II и објектив [FE PZ 28-135 мм F4 G OSS] во улога на ISS фотоапарат за надворешна употреба 

[Надворешен приказ на јапонскиот експериментален модул KIBO и приклучокот за фотоапаратот]

Приклучокот за фотоапаратот е поставен на врвот на јапонскиот експериментален модул KIBO. Оттаму може да се снима и Земјата и вселената. Модулот KIBO има воздушна комора и роботска рака што овозможуваат експериментирање и поставување или менување на опрема за набљудување, без потреба астронаутите да вршат активности надвор од вселенските летала.

Извор: JAXA

Извор: JAXA

Јапонски експериментален модул (JEM)

Јапонски експериментален модул (JEM)

1. Модул со кислород 2. Експериментален логистички модул-дел со кислород 3. JEM воздушна комора 4. JEM систем за далечинско управување 5. Изложен дел 6. Место на кое е поставен α7S II

Изложена и експериментална платформа заменлива преку IVA (i-SEEP) и фотоапарат


Изложена и експериментална платформа заменлива преку IVA (i-SEEP) и фотоапарат 

Многубројни тестови за безбедно и стабилно функционирање во вселената

- Како α7S II пристигна во Меѓународната вселенска станица?

Бидејќи вселената е во вакуум, нема проток на воздух што ќе ја намали топлината. За да го решиме овој проблем, фотоапаратот и објективот се ставени во алуминиумско куќиште, а максималниот допирен контакт со ова алуминиумско куќиште помага во губење на топлината. Куќиштето со фотоапаратот беше заштитено со меки материјали и беше пренесено како дел од товарот со кислород во јапонскиот KOUNOTORI.

- Какви тестови беа потребни за да се овозможи користење на фотоапаратот во Меѓународната вселенска станица?

Прво започнавме со тестови за спречување дефекти или оштетувања на фотоапаратот предизвикани од космичка радијација, а тестиравме и дали ќе може да работи во вакуум и при екстремно ниска температура. Моравме да утврдиме дека може да ги издржи вибрациите при полетувањето и да работи без да предизвикува електромагнетни пречки.
Покрај тоа, тестиравме дали фотоапаратот ќе може да го издржи електричниот или електромагнетниот шум што го создава другата опрема на ISS, а моравме да утврдиме и дека ќе може лесно да се контролира од површината на Земјата и да се преземаат сликите. Пред да го поставиме фотоапаратот во изложениот дел, го однесовме во експерименталниот модул каде што живеат и работат астронаутите во обична облека, но претходно направивме најразлични тестови за да се осигуриме дека ништо нема да им наштети, како на пример испуштање штетни гасови.

Ова е куќиштето со фотоапаратот за надворешна употреба. Долната кружна форма е објективот. Кружниот отвор овозможува снимање на надворешната средина

Хардверот е практично непроменет

Сигурна технологија што нуди неверојатна отпорност на лоши временски услови  

- Дали вршите специјални прилагодувања на опремата за да може фотоапаратот полесно да функционира во уникатните услови во вселената? 

Ако во таа средина го насочите фотоапаратот кон сонцето, сончевата светлина постепено ќе предизвика многу висока температура. Или, пак, ако го насочите спротивно од сонцето, температурата екстремно ќе се намали. Температурната разлика може да биде над 200 степени C (390 степени F), па затоа користиме ладилник за топлината и грејач за ладната температура со цел да обезбедиме континуирано функционирање.
Хардверот на фотоапаратот воопшто не е променет. Направивме многу тестови, но не наидовме на речиси никакви проблеми. Можноста за користење на α7S II таков каков што е во оваа средина говори многу за неговата сигурност и отпорност.

- Ве молам кажете ни како го прилагодивте α7S II за да може да се користи во вселената.

Бидејќи се користи далечински од Земјата, изменивме дел од фирмверот за да можеме да ги менуваме поставките за снимање преку оперативни команди. Речиси сите прилагодувања на експозицијата и другите поставки се контролираат далечински. Сега го користиме објективот со моторизиран зум SELP28135G, а зумот може да се контролира долу од Земјата. Исто така, сега може да снимаме датотеки со 4K видео и да ги праќаме на Земјата, како дополнителна функција на системот. Освен тоа, имаме надворешен извор за напојување бидејќи менувањето батерии ќе биде тешко поради локацијата на која е поставен, а напојувањето може да се вклучува и исклучува од Земјата.

Дури и кога е опремен со објектив со моторизиран зум(FE PZ 28-135 мм F4 G OSS), α7S II без модификации го собира во кутијата.

Разгорување на фантазијата и соништата со слики од вселената

- Кои луѓе би сакале да ги видат сликите што ќе ги снимите?

Всушност, сите луѓе. Повеќето проблеми на Земјата се тешки за разбирање во секојдневниот живот, но кога ќе ги погледнете од вселената, тогаш ќе сфатите. Сакам сликите да ги разгорат фантазиите и да ја разбудат љубопитноста. Ќе бидам пресреќен ако децата ги видат сликите и посакаат да работат во области поврзани со вселената - можеби да направат фотоапарат што ќе се користи во вселената. Ќе бидеме презадоволни ако придонесеме за подобрување на иднината.

Го променивме методот на напојување - ја заменивме батеријата со надворешен извор на напојување

Toshitami Ikeda

Toshitami Ikeda

Associate Senior Engineer
Mission Operations and Integration Center,
Human Spaceflight Technology Directorate
Japan Aerospace Exploration Agency

Дипломирал, а потоа се приклучил во NASDA (Национална агенција за вселенски развој на Јапонија, сега позната како JAXA). Учествувал во развојот и промовирањето на јапонскиот експериментален модул KIBO. Работи на оваа позиција од 2015 година.

Кликнете подолу за популарни производи